Ordu eta erdiko ibilbidea Bilboko bihotzean barrena.
Areatzatik abiatuko gara. Hiribilduko aisialdi-gune horretan nagusi da San Nikolas eliza barrokoa. Plaza berri neoklasikoa pasata, Joan Santuen elizara iristen gara, jesuiten eliza izandakora. Bertan hasten da hiribilduko Erdi Aroko gunea: Zazpi Kaleak.
Harresiaren ibilbideari jarraituta, San Anton elizara iritsiko gara; eliza honen aztarna arkeologikoek hastapeneko Bilbo erakusten digute. Horren inguruan zeuden lehengo udaletxea, Kontsulatua, zubia, portua, azoka… Erribera eta Belostikale pasata, Santiago Katedralera iritsiko gara, Bilboko erlijio-bizitzaren erdigunera.